قال الفنان أحمد الفيشاوي: أنا شخصية عايز أبقى لوحدي تمامًا، وأنا كده بقالي 6 سنين ولو ربنا إداني العمر هفضل لآخر نفس عايز أعيش لوحدي، لأني لما بعيش لوحدي معنديش رفاهية أني أخون حد أو حد يخوني، ولا أكذب على حد ولا حد يكذب عليا، ولا أنكد على حد ولا حد ينكد عليا، وأنا لو عندي زوجة أو عيال في البيت مش هعرف أعمل السينما اللي أنا عايزها، لا ضرر ولا ضرار. وتابع أحمد الفيشاوي ، في حواره مع الفنان عباس أبو الحسن، في بودكاست حوارات مع عباس: واحدة من مراتاتي قالتلي أنت لو سبتني هتموت لوحدك، والست دي ادتني سكة عمري ما فكرت فيها، وعمري ما كنت هكمل في الإخراج اللي أنا عايزه، وقلت ليه يبقى عندي 70 ولا 80 سنة وحواليا عيل بيعيط وبنجيب له أدوية وبامبرز، أنا في الآخر هدخل القبر لوحدي ليه يبقى حواليا دوشة وأنا بعد ساعتين هبقى تحت الأرض؟، ما أنا ممكن آخر ساعات في حياتي أقضيها لوحدي على سريري أقول يا رب ارحمني أنا بموت. وقال: وبيقولوا بعد الموت بيجي جسم جديد، ويا ريت بعد الشقى ده كله يكون فعلًا جسم جديد مش رماد، أنا نفسي أروح الجنة وأتمنى أشوف وجه الله الكريم، أنا مؤمن بيه، ولو قابلت ربنا هقوله وحشتني أوي أنا بحبك من زمان وكان نفسي أشوفك.
