خبير ذكاء اصطناعي يحذر من مشاركة المستندات الهامة

خبير ذكاء اصطناعي يحذر من مشاركة المستندات الهامة

حذر شحاتة السيد، خبير الذكاء الاصطناعي، من مشاركة المستندات مع برامج وتطبيقات الذكاء الاصطناعي.

وكتب “السيد” عبر حسابه الشخصي على موقع “فيسبوك” الآتي: “في ناس كتير بتدخل تكتب أسرارها لنماذج الذكاء الاصطناعي زي Chat GPT وهي متطمنة وبيحكيله أو بتحكيله مشاكلها العائلية أو تفاصيل شغله أو تلاقيه يبعتله أرقام أو عقود أو أسرار خطيرة، كأنه بيكلم صديق عمره، ودي أكبر غلطة هتودي صاحبها في داهية إن مكانش النهارده هيبقى بكره”؟

تابع: “علشان كده اللي لازم الناس تعرفه إن اللي بيكتبوه بيتسجل، وبيتحفظ في قواعد بيانات النماذج وبيتم استخدامها في إعادة تدريبها وتطويرها علشان تقدر تتفاعل بشكل أكبر مع حضرتك فحضرتك تنبسط وتشارك معلومات أكثر ظناً منك إنه خلاص بقى يفهمك أكتر من نفسك.. لا تشارك معلوماتك حتى لو الشركة بتقول إن بياناتك آمنة، مفيش حاجة أمان كامل، وحط في بالك إن أي معلومات قد تؤذيك لو حكيتها لغيرك تأكد مليون % إن الذكاء الاصطناعي هيفشخك بيها حرفياً، فخد بالك كده وخليك حريص يا صديقي، وخليكي حريصة يا مدام علشان منروحش بعد كده نلاقي صور حضرتك بتتباع في مواقع البورنو بعد ما الذكاء الاصطناعي أضاف لمسته عليها وحولها لصور جنسيه.. وده بالمناسبة لو محصلش السنة دي هيحصل بعد كام سنة، لأنه زي ما فيه ناس بتستخدمه في الخير فيه ناس أكتر بتستخدمه في الشر”.

أضاف: “الكارثة الأكبر إنه فيه ناس كتير بتشارك أسرار شركاتها ظناً منه إنه بيختصر الوقت وبيوفر فلوس، ده حقيقي وصحيح لكن مش النماذج دي اللي ممكن نستخدمها كده، فيه حاجات بتتعمل مخصوص للشركات وبتكلف فلوس كتير علشان تكون مخصصة فقط لشركتك وف نفس الوقت بتكون مسيطر على المعلومات وفي أمان، تلاقي يا اخي الواحد بيتناصح وبيشارك خطط مالية، ابتكارات لسه ما خرجتش للنور، أو أسرار شغل داخلية، طيب تخيل نفسك لو المعلومات بعد ما اتعاد تدويرها وبقي بيشاركها مع ملايين المستخدمين غيرك، مش كده ممكن تدمر شركتك يا صاحبي ، وتسببلك في خسائر كبيرة، أو تفتح أبواب لقضايا وتشوه سمعتك!”.

في نفس السياق، أردف: “والمصيبة بقى اللي يقولك هنخليه طبيب نفسي، أو يقوم بدور الطبيب ويكتبلي علاج، بلاش نسمع للناس دي يا جماعة، صحيح النماذج عندها قدرة على مجاراة الحديث في الجانب النفسي، لكن لا يمكن أبداً استخدامها في هذا الأمر، وزي ما قولت فوق عن الشركات علشان نستخدمه بالشكل ده لازم نماذج مدربة ومتخصصة وتحت إشراف أطباء متخصصين أو مستشفى متخصصة”.

اختتم: “خد بالك واحذر حتى لو الشركات بتحلف إنها بتحمي خصوصيتك، لازم تفتكر إن اللي قدامك مش بني آدم ولا عنده ضمير، اللي قدامك خوارزمية بتسجل كل حرف، وتأكد إن الشركات دي كل همها إنها تكسب بس، ولو هكلمكم على مصائب اتسبب فيها مشاركة البيانات الحساسة هنزعل كلنا ونضايق.. بعد كله ده هل الذكاء الاصطناعي مش مفيد.. لا مفيد جداً”.